- घराच्या किमतीच्या ८५ टक्क्यांपर्यंत गृहकर्ज मिळू शकतं. उर्वरित रक्कमही तुम्हाला जमा करावी लागते. याचा अर्थ असा की तुम्ही खरेदी करू इच्छिणाऱ्या घराची किंमत १५ ते २० लाख असेल तर तुम्हाला १६ लाखांपर्यंतचं गृहकर्ज घ्यावं लागेल. तसंच उर्वरित ४ लाख तुम्हाला जमा करावे लागतील.
- गृहकर्जात ईएमआय म्हणजे मासिक हप्ता हा खूप महत्त्वाचा मुद्दा आहे. तुमच्या घराची खरेदी ही दोन गोष्टींवर अवलंबून असते. एक म्हणजे तुम्ही किती गृहकर्ज घेता आणि त्याची परतफेड करताना तुम्ही किती रकमेचा ईएमआय भरू शकता. अविवाहित असाल तर तुमच्या निव्वळ उत्पन्नाच्या ६० ते ६५ टक्क्यांपेक्षा जास्त ईएमआय असू नये. विवाहित व्यक्तीसाठी तो संयुक्त निव्वळ उत्पन्नाच्या ३५ ते ४० टक्क्यांपेक्षा जास्त असता कामा नये. गृहकर्ज घेताना तुम्हाला खालील तीन टिप्सचा उपयोग करता येईल.
१. गृहकर्जाची रक्कम वाढवण्यासाठी स्वतःच्या आणि पत्नीच्या नावे संयुक्तरित्या गृहकर्ज घ्या. त्यात दोघांच्याही निव्वळ उत्पन्नामुळे अधिक रकमेचं गृहकर्ज मिळू शकेल.
२. कोणत्या बँकेकडून अथवा हाऊसिंग फायनान्स कंपनीकडून गृहकर्ज घ्यायचं हे ठरवताना केवळ मित्रांच्या सल्ल्यावर अवलंबून राहू नका. स्वतः त्यासंदर्भात माहिती घेऊन पूर्वतयारी करा आणि किमान दोन बँकांकडून गृहकर्ज मंजूर होईल, या दृष्टीने प्रयत्न करा. कारण एका बँकेने अचानकपणे तुम्हाला अपेक्षित असलेल्या रकमेचं कर्ज द्यायला असमर्थता दर्शवली तर दुसरा पर्याय तुमच्या हातात असला पाहिजे.
३. अशा गृहकर्जाची निवड करा, ज्यात सुरुवातीला कमी ईएमआय असेल आणि नंतरच्या वर्षात तो जास्त असेल. कारण भविष्यात तुमचं उत्पन्नही वाढते.
ब) कर्जाची परतफेड
गृहकर्जाची परतफेड करताना दोन पर्याय उपलब्ध असतात. पहिला पारंपरिक पद्धतीचा तर दुसरा आक्रमक पद्धतीचा. कोणती पद्धत निवडायची हे तुमची सुरुवातीची आर्थिक स्थिती कशी आहे आणि तुमची उद्दिष्ट्य काय आहेत, यावर अवलंबून असतं.
पारंपरिक पद्धत
फायदे - ईएमआयची रक्कम कमी असते.
पार्ट रिपेमेण्ट करण्यासाठी अतिरिक्त उत्पन्न वापरता येतं आणि त्यासाठी अतिरिक्त फीज लागत नाही.
तोटे - कर्जाची रक्कम लहान असते. त्यामुळे तुम्हाला घर घेताना तडजोड करावी लागते.
कर्जाची परतफेड करण्याची मुदत अधिक असते. त्यामुळे अनेक वर्षं ईएमआय भरताभरता कंटाळा येतो. शिवाय व्याजाची रक्कमही अधिक असते.
आक्रमक पद्धत
फायदे - कर्जाची रक्कम अधिक असते. त्यामुळे मोठं घर खरेदी करता येतं.
परतफेडीची मुदतही कमी असते. त्यामुळे जलद गतीने कर्जाची परतफेड होऊ शकते.
तोटे - ईएमआयची रक्कम अधिक असते. त्यामुळे त्याचा आर्थिक ताण येतो.
तुमची क्रेडिट हिस्ट्री चांगली नसेल तर बँका तुम्हाला मोठ्या रकमेचं कर्ज द्यायला तयार होत नाहीत.
